सैफुल्ला राइन
खोज तलास खबर, जनकपुरधाम ! नेकपा (एमाले) धनुषा जिल्ला अधिवेशन अन्तर्गत नयाँ नेतृत्व चयन गर्न आज बिहानदेखि मतदान सुरु भएको छ। अधिवेशनमा मतदान प्रक्रिया कडा सुरक्षाको बीचमा भइरहेको छ।
अधिवेशन स्थलमा नेपाल प्रहरी, सशस्त्र प्रहरी र पार्टीका स्वयंसेवकहरू परिचालन गरिएको छ। सुरक्षा निकायले सम्भावित अवाञ्छित गतिविधिहरू रोक्न विशेष सतर्कता अपनाएको छ।
धनुषा जिल्लाका १० भन्दा बढी स्थानीय तहबाट आएका प्रतिनिधिहरूले नयाँ जिल्ला नेतृत्व चयनका लागि मतदान गरिरहेका छन्। अधिवेशनमा अध्यक्ष, उपाध्यक्ष, सचिव, सह-सचिव लगायतका पदमा उम्मेदवारी दिइएको छ।
नेकपा एमालेका प्रदेश तथा केन्द्रीय नेताहरूको समेत उपस्थिति रहेको अधिवेशनलाई सफल बनाउन पार्टी कार्यकर्ताहरू सक्रिय देखिएका छन्। निर्वाचन प्रक्रिया दिउँसोसम्म सम्पन्न हुने अपेक्षा गरिएको छ भने मतगणना त्यसपछि सुरु गरिने छ।
पार्टीका एक नेताले भने, “संगठनलाई बलियो बनाउने उद्देश्यका साथ यो अधिवेशन सञ्चालन गरिएको हो, र हामी लोकतान्त्रिक प्रक्रिया अनुसार नयाँ नेतृत्व चयन गर्नेछौं।”
धनुषा जिल्लाको यो अधिवेशनले आगामी स्थानीय तथा संघीय निर्वाचनमा एमालेको भूमिकालाई निर्णायक बनाउने विश्वास गरिएको छ।
प्रतिक्रिया